Arnarulunnguaq isumaqarpoq ”arnaarannguaq”, arnaavorli ”imaannaanngitsoq” oqaluttuarisaanermi eqqaaneqartariaqartoq. Issittumi ilisimasassarsiornerni oqaluttuani pingaaruteqarnerpaatut Thulemit tallimassaanik ilisimasassarsiorneq aamma Knud Rasmussen oqaluttuaatigineqartut, kingusinnerusukkut aatsaat Arnarulunnguaq tusarsaalerpoq.

Thulemit ilisimasassarsiorluni aallaqataasunit 14-iusunit pingasuinnaat naammassivaat: Arnarulunnguaq, illooraa Qâvigarssuaq Miteq aamma Knud Rasmussen. 18.000 kilometerit, imaappoq nunarsuaq kaajallallugu affaata nalinga pisullutik, qimusserlutik, umiamillu angalavaat.

Piginnaasaqarluni, sapiissuseqarluni, meqquteqarlunilu ilisimasassarsiorneq
Ukiuni pingasuni ilisimasassarsiornermi akisussaaffiit agguataarsimalluarput; Miteq piniggarissuuvoq, sikusiullaqqippoq, aqqutissarsiullaqqillunilu. Knud Rasmussenip aqqutiminni inuit oqaloqatigalugit oqaluttuaannik, oqaluttuatoqaannillu katersineq pikkoriffigaa. Ilisimasassarsiornerullu iluatsinnissaanut Arnarulunnguaq aalajangiisuulluinnarluni: ilisimasassarsiorluni angalasut atisaat, kamiilu mersortarlugillu ilaartortarlugit. Immikkut piginnaasaqarnermikkut sila pikkunarsinnaaqisoq, ungasissumullu angalanertik anigorpaat.

Arnaq piginnaasarpassualik
Arnarulunnguaq mersullaqqiinnanngilaq, angutilli naligalugit piniaqataasarpoq, qimusseqataasarpoq, illunngualioqataasarpoq, nerisassiortarlunilu. Taakku saniisigut Knud Rasmussenimut ilisimatusarnermi ikiortitut sulivoq. Tassani ilaatigut inuit arnartaasa kakiortinneri ilaarlugit titartartarpai, soorluttaaq naasunik katersillunilu naasut asiunaveersittarai, itsarnisanillu assaanermi peqataasartoq.

Arnartatuaanngitsoq
Knud Rasmussen oqaluttuani oqaluttuarineqarluaqqissaartoq Miteq, Arnarulunnguaq aamma ilisimasassarsiornermi inuit angalaqataasut allat eqqaaneqarpianngillat. Kisianni aamma ilisimasassarsiornermi allanik arnaqarpoq. Arqioq aamma Arnannguaq, ilisimasassarsiornerup aallartinnerani uiminnik angalaqatiginnittut Arnarulunnguup arnaqatigai. Kisianni ilisimasassarsiornerup aallartinneranit, naammassinissaata tungaanut Arnarulunnguaq arnani kisiartaalluni ilaavoq.

Inuunermini atugartooq
Arnarulunnguup inuunera imaannaanngitsumik aallartissimavoq. Arfineq-marlunnik ukioqarluni angunni annaavaa, tamannalu ilaqutaanut annertuumik eqquisimalluni. Ilaqutariinni nalinginnaasumik angut nerisassanik pilersuisuusarmat, arnaat imminut aamma meeqqaminut sisamanut pilersuisariaqarsimavoq. Allamik aqqutissaqarsimanngilaq: qitornami arlaat pilliutigisariaqarsimavaa. Arnarulunnguaq nukarlersaallunilu niviarsiaraammat, siulliullugu pilliutigisariaqarsimavaa.

Knud Rasmussenip allaatigisai malillugit, pisup qanoq ilungersunartiginera paasillugu takutinniarlugu nammineerluni qungatsimigut allunaatsertariaqarsimavoq. Aniali Ajako aliatsalluni qissasersimavoq, arnaalu naggataatigut sapilersimalluni. Misigisap taassumap Arnarulunnguup inuunerminik qujamasuuteqalersippaa, inoqatiminullu qanilaalersillugu.

Toqulli malittuarpaa. Thulemit tallimassaanik ilisimasassarsiorneq 1921-mi aallartimmat Arnarulunnguaq 25-nik ukioqarpoq. Ania ilisimasassarsiornermi peqataasussatut toqqagaaqqaaraluartoq ilisimasassarsiornissaq qallilluinnartoq imminorsimavoq, tamanna pillugu Arnarulunnguaq uinilu Knud Rasmussenimit peqataasussatut toqqarneqarput. Nuummit aallanngitsiarlutik ajoraluartumik uia puallulluni toqukkut qimaguppoq. Arnarulunnguaq inuunermini misigisassaminik ilisimasassarsiornermi peqataaginnarniarluni aalajangerpoq.

Arnarulunnguaq 37-nik ukioqarluni tuberkuloserluni Uummannap napparsimmaviani 1933-mi – ukiumi Knud Rasmussenip toqquviani – toqukkut qimaguppoq.

Tamatsinnut maligassiuisoq
Meqqusaalimmi tamatsinnut maligassiuivoq, asimiissinnaanermut immikkuullarilluinnartumik piginnaasalik. Kiinaanik ilisarnaatitalimmik tujuuluaqqamik, aasaq manna nersorparput. Arnaq tamatta tulluusimaarutigisinnaasarput, isumassarsiorfigisinnaasarpullu. Kisianni aamma silarlutsillugu immitsinnut pinngitsoorsinnaannginnitsinnik immitsinnut eqqaasitsissutissatut.

Knud Rasmussenip nammineerluni oqarsimaneratut: ”Arnani kisiartaalluni Sullualukkoorsimasutut, Puigorneqanngisaannartussatut qallunaat-kalaallit Oqaluttuaanni ilaatinneqassaaq.”