Erfalasoq assorluni oqumillunilu

Juunip 21-ni 1985 siullerpaamik nammineerluta erfalasorput amusinnaalerparput. Erfalasorput, inuiattut ullorsiornermi. Erfalasoq inuiaqatigiiunitsinnik, pinngortitamik inuuffitsinnik namminersuleriartornitsinnilu allornitsinnik siullernik takutitsisoq.

Ulloq taanna sioqqullugu nuna tamakkerlugu ilusilersuinissamik unammisitsisoqarpoq, siunnersuutillu 500-t sinnillit nassiunneqarput. Eqqumiitsuliortorli Thue Christiansen erfalasumik ullumi nalunngilluakkatsinnik ilusiliisoq ajugaatinneqarpoq. Amuneqannginneranili isummat akerliunerillu amerlapput. Ilaatigut nunani avannarlerni allanisulli sanningasortaqannginnera pissutigalugu.

Thue Christiansenimulli qanigisamit sunnertisimaneq pingaarnerusimavoq, tassalu pinngortitarsuarmit.

Erfalasussamik eqqarsaatersuutai siullit 1970-ikkunnili pinngoralerersimapput, ukiummi taakku Kalaallit Nunaannut aalajangiisuulluinnarsimapput, aammali Europamut EU-p pilersinneratigut. Tamatuma nalaani kalaallit inuusuttut amerlasuut Københavnimi ilinniarfinni naammassiortorput silarsuarmilu pisut qanimut malinnaaffigisinnaallugit. Thue Christiansenilu aamma politikkimik suliaqalereersimavoq erfalasumik nammineq pigisamik eqqarsaat piulermat. Taamanili erfalasussamut ullumikkut atukkatsinnut ilusissatut titartaqqaagai piulereersimapput. 

Seqinertut aappilasoq. Sermitut qaqortigisoq.   

Thue Christiansen eqqumiitsuliortutut sulinermini pinngortitamik tiguartisimavoq. Nalaatsornerinnaanngilarlu Erfalasorput pinngortitamit avatangiisitsinnit sunnerneqarsimammat.

Qeqqani ammalortortaa seqinermit taassumalu kaavittuarneranik isumassarsiaapput – seqineq nuiguni qilammi ingerlaguni ingerlaguni tarrissaaq. Qaamanermut takkuteqqittumut, tarrittumut tamatigulli takkuteqqittuaannartumut assersuussaavoq. Ammalortup aappaluttortaata imaq kangerluvullu qinngortuut seqinermit aappillersitat ersersippai. Erfalasullu qaqortortaa sermersuarmit nunatsinnillu qalliisumit inuunitsinnillu ilusilersuisumit isumassarsiaavoq.

Danmarkimi oqaluttuarisaanitsinnni  sorlaqarfeqatigut ilassiniarlugillusooq qalipaatit aappalaartoq qaqortorlu Dannebrogimi qalipaataasut atorneqarput.

Erfalasorput ataatsimoorfigaarput

Ullumikkut erfalasoq nunatsinnut asanninnermik ataatsimoornitsinnullu sakkortuumut ersiutaavoq. Inuiattut ullorsiornerni, inuuvissiornerni, katittoqarnerani allanillu nuannersunik pisoqarnerani ataatsimoorfigisarparput. Aammali erfalasoq kinaassutsimik misigisimanermik, nukittussutsimik imminullu tatiginermik pilersitsisarpoq, timersorluni unammiuaartoqartillugu allatigulluunniit nuna tamakkerlugu nalliuttorsiortoqartillugu. Tamannalu piffissami kingullermi qaninnermi misigilluarparput nukiit taartut inuiaqatigiittut nunatullu ataasiusutut nalaataqarnitsinni.